ភ្នំពេញ៖ និយ័តករគណនយ្យនិងសវនកម្ម (ន,គ,ស,) រំលឹកដល់ម្ចាស់សហគ្រាស និងប្រធានអង្គភាពមិនស្វែងរកប្រាក់- ចំណេញទាំងអស់ ត្រូវយកចិត្តទុកដាក់ និងរួសរាន់អនុវត្តកាតព្វកិច្ចដាក់បញ្ចូនរបាយការណ៏ហិរញ្ញវត្ថុសម្រាប់កាលបរិច្ឆេទគណនេយ្យ ២០២២ មក ន.គ.ស. ឱ្យបានទាន់ពេលកំណត់ចៀសវាងការទទួលរងពិន័យ។

សេចក្តីជូនដំណឹងរបស់និយ័តករគណនយ្យនិងសវនកម្ម នៅថ្ងៃទី៥ ខែមេសា ឆ្នាំ២០២៣ បានរំលឹកដល់ម្ចាស់សហគ្រាស និងប្រធានអង្គភាពមិនស្វែងរកប្រាក់ចំណេញកាតព្វកិច្ចដាក់ បញ្ជូនរបាយការណ៍ហិរញ្ញវត្ថុប្រចាំឆ្នាំ ២០២២ មកន.គ.ស. តាមប្រព័ន្ធអនឡាញ (E-Filing) សម្រាប់សហគ្រាស និងអង្គភាពមិនស្វែងរកប្រាក់ចំណេញ ដែលមិនរងសវនកម្មឯករាជ្យ នឹងត្រូវផុតកំណត់ត្រឹមថ្ងៃទី១៥ ខែមេសា ឆ្នាំ២០២៣ និងសម្រាប់សហគ្រាស និងអង្គភាពមិនស្វែងរកប្រាក់ចំណេញដែលរងសវនកម្មឯករាជ្យនឹងផុតកំណត់នៅថ្ងៃទី១៥ ខែកក្កដា ឆ្នាំ២០២៣ ខាងមុខនេះ។

និយ័តករគណនយ្យនិងសវនកម្ម បានបញ្ចាក់ថានឹងចុះត្រួតពិនិត្យដល់ទីតាំងរបស់សហគ្រាស និងអង្គភាពមិនស្វែងរកប្រាក់ចំណេញ តាមការចាំបាច់ ដោយអនុលោមតាមច្បាប់ស្តីពីគណនេយ្យ និងសវនកម្ម និងបទប្បញ្ញត្តិពាក់ព័ន្ធជាធរមាន៕